🔸 प्रतिकदादा पाटील यांच्या मार्गदर्शनाखाली उरूण ईश्वरपूर येथे भव्य आयोजन
🔸 सांगली जिल्हा व्हॉलीबॉल असोसिएशनच्या उत्कृष्ट आयोजनाला क्रीडारसिकांचा प्रतिसाद
🔸 मुलांच्या विभागात पुणे उपविजेते, कोल्हापूर तिसऱ्या क्रमांकावर
🔸 महिलांच्या स्पर्धेत सांगली उपविजेता; वर्धा संघाने पटकावला तिसरा क्रमांक
🔸 लोकनेते राजारामबापू पाटील क्रीडानगरीत चार दिवस क्रीडारसिकांची उत्साहपूर्ण गर्दी
🔸 राज्य अजिंक्यपदासाठी मुलं-मुलींच्या गटात चुरशीच्या सामन्यांना क्रीडाप्रेमींचा भरघोस प्रतिसाद
🔸 अंतिम सामन्यांत अचूक सर्व्हिस व दमदार स्मॅशने मुंबई उपनगर व पुणे जिल्ह्याचा विजय
🔸 उदयोन्मुख खेळाडूंना मोठ्या व्यासपीठाची संधी; राज्यभरातून आलेल्या संघांचे कौतुक
सांगली । जिल्हा व्हॉलीबॉल असोसिएशन ने राज्य व्हॉलीबॉल असोसिएशनचे अध्यक्ष प्रतिकदादा पाटील यांच्या मार्गदर्शनाखाली उरूण ईश्वरपूर येथे आयोजित केलेल्या लोकनेते राजारामबापू पाटील वरिष्ठ गट पुरुष व महिला राज्य अजिंक्यपद व्हॉलीबॉल स्पर्धेत मुलांच्या गटात मुंबई उपनगरचा संघ, तर मुलींच्या गटात पुणे जिल्हा संघ विजेता ठरला आहे.
मुलांच्यामध्ये पुणे जिल्हा संघाने दुसरा,तर कोल्हापूर जिल्हा संघाने तिसरा, तसेच मुलींच्यामध्ये सांगली संघाने दुसरा, आणि वर्धा संघाने तिसरा क्रमांक पटकाविला आहे. येथील पोलीस कवायत मैदानावर गेल्या चार दिवस मोठ्या उत्साहात या स्पर्धा पार पडल्या.
मुलांच्या अंतिम सामन्यात मुंबई उपनगर संघाने आक्रमक खेळ करत पहिले दोन सेट २५-२२, २५-२१ या फरकाने जिंकले. मात्र तिसरा सेट पुणे संघाने २५-१३ ने जिंकून लढतीत रंगत आणली. मुंबई संघाने चौथा सेट २५-१७ फरकाने जिंकून अजिंक्यपदावर शिकामोर्तब केले. मुंबई उपनगरकडून कॅप्टन हर्ष चौधरी, मुबारक सय्यद, पवन पोवार, मधुर ऋतुराज दुबे, तर पुणे संघाकडून कॅप्टन केशव गायकवाड, प्रितम जाधव, आदर्श राऊत, शंकर चिकने यांनी जोरदार खेळ केला.
मुलींच्या अंतिम सामन्यात मात्र पुणे संघा ने सलग तीनही सेट २५-१३,२५-१९,२५-१२ अशा फरकाने जिंकून सांगली जिल्हा संघावर मात करीत मुलींचे अजिंक्यपद पटकाविले. पुणे संघाकडून अनन्या,जननी,अलिना, कुंजना,चंदना,पवित्रा या खेळाडूंनी आक्रमक खेळ करीत संघाच्या विजयात योगदान केले. सांगलीच्या आंतरराष्ट्रीय खेळाडू प्रज्ञा वरेकर, मनवा पाटील, वेदिका शिंदे आणि अक्षदा वावरे या खेळाडूंची शर्थ व्यर्थ ठरली.
उरूण ईश्वरपूर : येथील राज्य अजिंक्य पद व्हॉलीबॉल स्पर्धेतील मुलींच्या गटात प्रथम विजेत्या पुणे जिल्हा संघास बक्षीस वितरण करताना राज्य संघटनेचे अध्यक्ष प्रतिकदादा पाटील, सचिव विरेल शहा, प्रा.संदीप पाटील, पोपट पाटील, राजेंद्र सातपुते, मोहन पाटील, प्रकाश पाटील व मान्यवर
तिसऱ्या क्रमांकाच्या सामन्यात मुलांच्या कोल्हापूर संघाने सांगली संघास,तर मुलींच्या वर्धा संघाने कोल्हापूर संघास पराभूत करीत तिसरा क्रमांक पटकाविला. सुप्रसिध्द समालोचक प्रसाद कुलकर्णी (राजारामनगर) आणि रेडिओ शुगरचा आरजे ओंकार यांच्या सुंदर समालोचनाने या स्पर्धेची रंगत चांगलीच वाढली.
जिल्हा सचिव प्रा.संदीप पाटील, उपाध्यक्ष मोहन पाटील, खजिनदार पोपट पाटील, सहसचिव अमोल खोत, सदस्य राजेंद्र सातपुते, प्रा.संग्राम पाटील, प्रकाश पाटील, श्रीकांत पाटील, क्रीडा प्रशिक्षक जमीर आत्तार, प्रा.शरद पाटील, राहुल पवार, सतिश मोरे, भारत पाटील यांच्यासह जिल्हा संघटनेचे पदाधिकारी व कार्यकर्त्यांनी, तसेच उरूण ईश्वरपूर व्यायाम मंडळ व साखराळेच्या जयंत स्पोर्ट्स, फिनिक्स हँडबॉल क्लबच्या खेळाडूं नी स्पर्धा यशस्वी करण्यासाठी परिश्रम घेतले.
उत्कृष्ठ नियोजनबद्दल कौतुक…
प्रशस्त गॅलरी,लख्ख प्रकाशझोत,राज्यातून आलेल्या मुले व मुली खेळाडूंची रहाण्याची व जेवणाची उत्तम व्यवस्था आणि उत्कृष्ठ नियोजनाबद्दल राज्यातून,जिल्ह्यातून आलेले पदाधिकारी,आजी-माजी खेळाडू आणि क्रीडाप्रेमीकडून प्रतिकदादा पाटील व त्यांच्या सहकाऱ्यांचे कौतुक करण्यात आले.
आ. जयंतराव पाटील प्रेक्षक गॅलरीत…
या राज्य अजिंक्यपद स्पर्धेचा अंतिम सामना सुरू असताना आ.जयंतराव पाटील हे स्पर्धेच्या ठिकाणी आले. त्यांनी काही वेळ प्रेक्षक गॅलरीत बसून या सामन्याचा आनंद घेतला. यावेळी अनेकांनी त्यांच्याशी हस्तांदोलन करत सेल्फी घेतले.
