IPL 2025 : येत्या 22 मार्चपासून रंगणार आयपीएलचा थरार

Last Updated on 13 Mar 2025 7:56 PM by Sanjay Patil/Adhorekhit

IPL 2025 : आयपीएल २०२५ या हंगामाची सुरुवात २२ मार्च रोजी गतविजेत्या कोलकाता नाईट रायडर्स आणि रॉयल चॅलेंजर्स बंगळुरु यांच्यातील सामन्याने होईल. हा सामना कोलकात्यातील ऐतिहासिक ईडन गार्डन्स मैदानावर खेळला जाईल तर आयपीएल२०२५ चा अंतिम सामनाही २५ मे रोजी त्याच मैदानावर खेळला जाईल. यंदाचा आयपीएलचा हंगाम २२ मार्च ते २५ मे दरम्यान खेळविला जाणार असून एकूण ७४ सामने १३ वेगवेगळ्या ठिकाणी होणार आहेत.

आयपीएल २०२५ चे सामने लखनौ, मुंबई, हैदराबाद, चेन्नई, अहमदाबाद, विशाखापट्टणम, गुवाहाटी, बेंगळुरू, न्यू चंदीगड, जयपूर, दिल्ली, कोलकाता आणि धर्मशाळा येथे खेळवले जातील.

इंडियन प्रीमियर लीग (आयपीएल) चा १८ वा हंगाम २२ मार्च रोजी गतविजेता कोलकाता नाईट रायडर्स (केकेआर) आणि रॉयल चॅलेंजर्स बंगळुरू (आरसीबी) यांच्यातील सामन्याने सुरू होईल. यानंतर दुसऱ्या दिवशी म्हणजे २३ मार्च रोजी दोन सामने खेळवले जातील. पहिला सामना २३ मार्च रोजी सनरायझर्स हैदराबाद आणि राजस्थान राॅयल्स यांच्यात खेळला जाईल. यानंतर, दुसरा सामना चेन्नई सुपर किंग्ज आणि मुंबई इंडियन्स यांच्यात संध्याकाळी ७:३० वाजता खेळला जाईल. या हंगामात लीग टप्प्यात चेन्नई आणि मुंबईमध्ये दोनदा आमनेसामने येतील. त्याच वेळी, ७ एप्रिल रोजी आरसीबी आणि मुंबई यांच्यात फक्त एकच लीग सामना खेळला जाईल. हा सामना मुंबईतील वानखेडे स्टेडियमवर होणार आहे.

२३ मार्च रोजी पहिला डबल हेडर

१८ व्या हंगामातील पहिला डबल हेडर २३ मार्च रोजी, स्पर्धेच्या दुसऱ्या दिवशी होईल. एसआरएच आणि आरआर हैदराबादमध्ये दुपारी ३.३० वाजता आमनेसामने येतील. मुंबई आणि चेन्नई यांच्यातील सामना संध्याकाळी ७.३० वाजता खेळला जाईल. यानंतर, ३० मार्च रोजी डबल हेडर होईल.

५, ६, १२, १३, १९, २० आणि 27 एप्रिल रोजी दररोज दोन सामने होतील. ४, ११ आणि १८ मे रोजी डबल हेडर खेळवले जातील. सर्व डबल हेडर फक्त शनिवारी किंवा रविवारी असतील.