उपमुख्यमंत्री म्हणून एकनाथ शिंदे व अजित पवार यांनी घेतली शपथ
ऐतिहासिक आझाद मैदानात प्रधानमंत्री नरेंद्र मोदी यांच्या प्रमुख उपस्थितीत पार पडला शपथविधी
मुंबई । ‘मी पुन्हा येईन’, असं आश्वासन जनतेला २०१९ साली विधिमंडळाच्या शेवटच्या अधिवेशनात देणारे तत्कालीन मुख्यमंत्री देवेंद्र फडणवीस आता पाच वर्षांच्या प्रतीक्षेनंतर पुन्हा एकदा महाराष्ट्राचे २१ वे मुख्यमंत्री म्हणून सत्तेवर आले आहेत. त्यांनी आज तिसऱ्यांदा महाराष्ट्राच्या मुख्यमंत्रीपदाची शपथ घेतली आहे. देवेंद्र फडणवीस यांच्यासह महाराष्ट्राचे मावळते मुख्यमंत्री एकनाथ शिंदे यांनी देखील उपमुख्यमंत्रीपदाची शपथ घेतली. तसेच राष्ट्रवादी काँग्रेसचे प्रमुख नेते अजित पवार यांनीदेखील उपमुख्यमंत्रीपदाची शपथ यावेळी घेतली. राज्यपाल सीपी राधाकृष्णन यांनी त्यांना पद आणि गोपनीयतेची शपथ दिली. शपथविधी सोहळ्याला प्रधानमंत्री नरेंद्र मोदी यांची विशेष उपस्थिती होती.
केंद्रीय संरक्षण मंत्री राजनाथ सिंह, केंद्रीय गृहमंत्री अमित शाह, केंद्रीय आरोग्यमंत्री जगतप्रकाश नड्डा, केंद्रीय भूपृष्ठ परिवहन व महामार्ग मंत्री नितीन गडकरी, केंद्रीय कृषि मंत्री शिवराजसिंह चौहान, केंद्रीय अर्थमंत्री निर्मला सीतारामन, केंद्रीय वाणिज्य व उद्योगमंत्री पियुष गोयल, केंद्रीय परराष्ट्र व्यवहार मंत्री डॉ. एस जयशंकर, केंद्रीय पर्यावरण मंत्री भुपेंदर यादव, केंद्रीय माहिती तंत्रज्ञान व रेल्वे मंत्री अश्विनी वैष्णव, केंद्रीय अवजड उद्योगमंत्री एच. डी. कुमारस्वामी, केंद्रीय शिक्षणमंत्री धर्मेंद्र प्रधान, केंद्रीय सूक्ष्म मध्यम लघू उद्योगमंत्री जितनराम मांझी, केंद्रीय दळणवळण मंत्री जोतिरादित्य सिंधिया, केंद्रीय संसदीय कार्यमंत्री किरेन रिजिजू, केंद्रीय मत्स्य व्यवसाय व पशुसंवर्धन मंत्री राजीव रंजन सिंह, केंद्रीय अन्न प्रक्रिया उद्योगमंत्री चिराग पासवान, उत्तर प्रदेशचे मुख्यमंत्री योगी आदित्यनाथ, आंध्रप्रदेशचे मुख्यमंत्री चंद्राबाबू नायडू, बिहारचे मुख्यमंत्री नितीश कुमार, अरुणाचल प्रदेशचे मुख्यमंत्री पेमा खांडू, आसामचे मुख्यमंत्री हिमंत बिस्वा शर्मा, छत्तीसगढचे मुख्यमंत्री विष्णूदेव साय, गोव्याचे मुख्यमंत्री प्रमोद सावंत, गुजरातचे मुख्यमंत्री भूपेंद्र पटेल, हरियाणाचे मुख्यमंत्री नायब सिंग सैनी, मध्य प्रदेशचे मुख्यमंत्री मोहन यादव, मेघालयचे मुख्यमंत्री कॉनरॅड संगमा, राजस्थानचे मुख्यमंत्री भजनलाल शर्मा, त्रिपुराचे मुख्यमंत्री मानिक साहा, उत्तराखंडचे मुख्यमंत्री पुष्कर सिंह धामी, पुद्दुचेरीचे मुख्यमंत्री एन रंगस्वामी, ओडिशाचे मुख्यमंत्री मोहन मांझी, मणिपूरचे मुख्यमंत्री एन बिरेन सिंह, नागालँडचे मुख्यमंत्री नेफ्यु रिओ, सिक्कीमचे मुख्यमंत्री प्रेमसिंह तमांग, केंद्रीय राज्यमंत्री सर्वश्री रामदास आठवले, मुरलीधर मोहोळ, प्रतापराव जाधव, रक्षा खडसे, विविध राज्याचे उपमुख्यमंत्री सर्वश्री केशव प्रसाद मौर्य, ब्रजेश पाठक, पवन कल्याण, राजेंद्र शुक्ला, अरुण सावो, विजय शर्मा, प्रेमचंद बैरवा, विजयकुमार सिन्हा, सम्राट चौधरी, कनक बर्धन सिंह देव, प्रवती परिदा, चौना मेन, प्रेसतोन त्यांसोंग, यांथुंगो पटॉन, टी. आर. झेलियांग, एस धार, श्रीमती दिया कुमारी यांच्यासह साधू, संत, महंत, विविध धर्मांचे गुरु, राज्यातील खासदार, आमदार, विविध राजकीय पक्षांचे वरिष्ठ नेते, उद्योग, क्रीडा, मनोरंजन क्षेत्रातील विविध मान्यवर, विशेष निमंत्रित अतिथी उपस्थित होते. केंद्रीय मंत्रिमंडळातील मंत्री, २२ राज्यांचे मुख्यमंत्री, देशभरातील शेकडो दिग्गज व्यक्ती आणि ४० हजार नागरिकांच्या उपस्थितीत मुख्यमंत्री आणि दोन्ही उपमुख्यमंत्र्यांचा भव्य शपथविधी सोहळा आज पार पडला. महाराष्ट्राचे मुख्यमंत्री आणि दोन्ही उपमुख्यमंत्र्यांचा शपथविधीचा भव्य सोहळा आज पार पडला.मुंबईच्या आझाद मैदानावर अत्यंत दिमाखदार असा महाशपथविधी सोहळा पार पडला.
बुधवारी सायंकाळी मुख्यमंत्रिपदाची शपथ घेण्याआधी देवेंद्र फडणवीस यांनी दुपारी १२ वाजताच्या सुमारास सिद्धिविनायकाचे दर्शन घेतले. त्यांनतर त्यांनी मुंबादेवीचे दर्शन घेतले. एकंदरित त्यांनी त्यांच्या महत्त्वाच्या दिवसाची सुरुवात देवदर्शनाने केली. गणरायाचे आणि मुंबादेवीचे दर्शन घेतल्यानंतर त्यांच्या सागर बंगल्यावर गोमातेची पूजा करण्यात आली. यानंतर फडणवीसांच्या भेटीला शिंदे गटाच्या आमदारांनी हजेरी लावली. साधारणातः ४.३० वाजताच्या सुमारास फडणवीसांनी सह्याद्री येथे केंद्रीय मंत्री अमित शहा येथे भेट घेतली आणि त्यानंतर तिथे काही वेळ थांबल्यानंतर फडणवीस आझाद मैदानाच्या दिशेने रवाना झाले. शपथविधी सोहळ्यासाठी देवेंद्र फडणवीस, एकनाथ शिंदे आणि अजित पवार हे तिघेही एकत्रितपणे ०५ वाजून २२ मिनिटांनी व्यासपीठावर आले. या व्यासपीठावरून देवेंद्र फडणवीस यांनी बरोबर ०५ वाजून ३५ मिनिटांनी तिसऱ्यांदा मुख्यमंत्रिपदाची शपथ घेतली.
शपथविधी समारंभाला शाहरुख खान, सलमान खान, सचिन तेंडुलकर, संजय दत्त, माधुरी दीक्षित, श्रीराम नेने, रणवीर सिंग, मुकेश अंबानी, अनंत अंबानी, अमित शाह, नितिश कुमार, योगी आदित्यनाथ, निर्मला सितारामण, ज्योतिरादित्य शिंदे, अनिल अंबानी, रणबीर कपूर, नितीन गडकरी, शिवराज सिंह चौहान, सुनिल तटकरे, आसिष शेलार, रामदास आठवले, गोव्याचे मुख्यमंत्री प्रमोद सावंत यांच्यासह इतरही अनेक मान्यवर उपस्थित आहेत.
या कार्यक्रमाला नेते अभिनेत्यांसह सर्वच पक्षाचे नेते उपस्थित होते. त्याचबरोबर राज्यभरातून आलेले कार्यकर्तेही यावेळी मोठ्या संख्येनं उपस्थित होते. राज्याच्या सर्वच भागातून या शपथविधी सोहळ्याचे साक्षीदार होण्यासाठी कार्यकर्ते हजर होते.
दरम्यान, मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री अजित पवार यांनी शपथ घेतल्यानंतर प्रथमच मंत्रालयात आगमन झाले. यावेळी त्यांचे औक्षण करून स्वागत करण्यात आले. तिन्ही नेत्यांनी मंत्रालय प्रांगणातील राजमाता जिजाऊ माँ साहेब, छत्रपती शिवाजी महाराज, महात्मा जोतीराव फुले, क्रांतीज्योती सावित्रीबाई फुले, भारतरत्न डॉ. बाबासाहेब आंबेडकर यांच्या प्रतिमांना तसेच संविधान उद्देशिकेला अभिवादन केले.
