मुंबई । लाडक्या बहिणींचे सध्या सणासुदीचे दिवस सुरू आहेत. नवरात्र, दसरा आणि दिवाळी हे तिन्ही सण पाठोपाठ आहेत. त्यामुळे लाडकी बहीण योजनेअंतर्गत पात्र महिलांना नोव्हेंबर महिन्याचे पैसे ऑक्टोबर महिन्यातच देण्याचा निर्णय सरकार घेणार आहे. त्याबाबत उपमुख्यमंत्री अजित पवार यांनी जाहीर सभेत याबाबत स्पष्ट केले आहे.
भाऊबीज म्हणून राज्य सरकारच्या वतीने नोव्हेंबर महिन्याचे 1 हजार 500 रुपये ऑक्टोबर महिन्यात देण्यात येतील, असे अजित पवार म्हणाले होते. म्हणजेच ऑक्टोबर महिन्यात लाडक्या बहिणींना एकूण 3 हजार रुपये मिळणार आहेत.अजित पवार यांनी सांगितल्यानुसार, ऑक्टोबर आणि नोव्हेंबर या दोन्ही महिन्याचे 3 हजार रुपये लाडक्या बहिणींना याच महिन्याच्या 10 तारखेपर्यंत मिळणार आहेत.
महिलांना आत्तापर्यंत मिळाले तीन हप्त्याचे पैसे
मुख्यमंत्री माझी लाडकी बहीण योजनेच्या लाभार्थी महिलांना आतापर्यंत जुलै, ऑगस्ट आणि सप्टेंबर अशा तीन महिन्यांचे पैसे मिळालेले आहेत. आता ऑक्टोबर महिन्यात आगामी दोन हप्यांचे पैसे दिले जातील.
कागदपत्रांची त्रुटी किंवा अन्य कारणामुळे पैसे न मिळालेल्या महिलांना या दोन्ही महिन्याचे 3 हजार रुपये सप्टेंबर महिन्यात देण्यात आले होते. त्यामुळे महिलांनी आपल्या बँक खात्याची केवायसी तसेच बँक खात्याला आधार क्रमांक जोडून घ्यावा, असे आवाहन केले जात आहे.
