Last Updated on 21 Sep 2024 9:22 PM by Sanjay Patil/Adhorekhit
नव्या विहिरींना चार लाख, तर जुन्या दुरुस्ती एक लाख अनुदान मिळणार
बिरसा मुंडा कृषी क्रांती योजनेचे निकष सुधारून विहिरी, शेततळे, वीज जोडणी आदींसाठी भरीव अनुदान देण्याचा निर्णय घेण्यात आला आहे.सुधारित निर्णयानुसार नवीन सिंचन विहिरीस 4 लाखांपर्यंत तर जुन्या विहिरींच्या दुरुस्तीस 1 लाखांपर्यंत अनुदान देण्यात येईल. पूर्वी हे अनुदान अनुक्रमे अडीच लाख आणि पन्नास हजार एवढे होते. इनवेल बोअरिंगसाठी आता 40 हजार तसेच यंत्रसामुग्रीसाठी 50 हजार रुपये आणि परसबागेकरिता 5 हजार देण्यात येईल. नवीन विहिरींबाबत 12 मीटर खोलींची अट रद्द करण्यात आली आहे. तसेच दोन सिंचन विहिरींमधील 500 फूट अंतराची अट सुद्धा रद्द करण्यात आली आहे. शेततळ्याच्या प्लॅस्टिक अस्तरीकरणासाठी सध्या 1 लाख रुपये अनुदान देण्यात येते आता ते प्रत्यक्ष खर्चाच्या 90 टक्के किंवा 2 लाख यापैकी जे कमी असेल ते देण्यात येईल. त्याच प्रमाणे तुषार सिंचनासाठी सध्या 25 हजार रुपये देण्यात येतात. आता तुषार सिंचन संच 47 हजार रुपये किंवा प्रत्यक्ष खर्चाच्या 90 टक्के अनुदानापैकी जे कमी असे ते अनुदान देण्यात येईल. अशाच प्रमाणे ठिबक सिंचन संचासाठी 97 हजार किंवा प्रत्यक्ष खर्चाच्या 90 टक्क्यांपैकी जे कमी असेल ते अनुदान देण्यात येईल.
याशिवाय इतरही अनेक निकषांमध्ये आवश्यक त्या सुधारणा करण्यात आल्या आहेत. बिरसा मुंडा कृषी क्रांती योजना (क्षेत्रांतर्गत व क्षेत्राबाहेरील) या योजनेंतर्गत घटकांचे आर्थिक मापदंड वाढविणे, निकषांमध्ये सुधारणा व नवीन घटकांचा समावेश करण्यात आला आहे
या योजनेंतर्गत पुढीलप्रमाणे अनुदानात वाढ व निकषांमध्ये सुधारणा करण्यात आली आहे.
शेततळ्याचे प्लॅस्टिक अस्तरीकरण
प्रचलित आर्थिक मापदंड व शेततळ्याचे आकारमानानुसार परिगणित होणाऱ्या रकमेच्या किंवा प्रत्यक्ष खर्चाच्या 90 टक्के किंवा 2 रुपये लाख यापैकी जे कमी असेल ते.इनवेल बोअरिंगसाठी 40 हजार रुपये,वीज जोडणी आकारासाठी 20,000 किंवा प्रत्यक्ष भरलेला आकार यापैकी जे कमी असेल ते .विद्युत पंपसंच/डिझेल इंजिनसाठी 10 अश्वशक्ती क्षमतेपर्यंत पंपसंचकरिता प्रचलित आर्थिक मापदंडाच्या किंवा प्रत्यक्ष होणाऱ्या खर्चाच्या 90 टक्के किंवा 40,000 रुपये यापैकी जे कमी असेल ते. सोलार पंप (वीज जोडणी आकार व पंपसंच ऐवजी) प्रचलित आर्थिक मापदंडाच्या किंवा प्रत्यक्ष खर्चाच्या 90 टक्के किंवा 50,000 रुपये यापैकी जे कमी असेल ते. एचडीपीई/ पीव्हीसी पाईपसाठी प्रचलित आर्थिक मापदंडाच्या किंवा प्रत्यक्ष होणाऱ्या खर्चाच्या 100 टक्के किंवा 50,000 रुपये यापैकी जे कमी असेल ते .
सूक्ष्म सिंचन संच मध्ये तुषार सिंचन संचासाठी
प्रचलित आर्थिक मापदंडान्वये तुषार सिंचन संच- 47,000 रुपये किंवा प्रत्यक्ष खर्चाच्या 90 टक्के अनुदान यापैकी जे कमी असेल ते.
ठिबक सिंचन संचासाठी प्रचलित आर्थिक मापदंडान्वये ठिबक सिंचन संच- 97,000 रुपये किंवा प्रत्यक्ष खर्चाच्या 90 टक्के अनुदान यापैकी जे कमी असेल ते.तुषार सिंचन संच पुरक अनुदान प्रति थेंब अधिक पीक योजनेंतर्गत (1) अल्प /अत्यल्प भूधारकांसाठी 55 टक्के + मुख्यमंत्री शाश्वत सिंचन योजनेतून 25% + बिरसा मुंडा कृषी क्रांती योजनेतून 10 टक्के तसेच (2) बहू भूधारकांसाठी 45 टक्के + मुख्यमंत्री शाश्वत सिंचन योजनेतून 30टक्के + बिरसा मुंडा कृषी क्रांती योजनेतून 15 टक्के किंवा 47,000 रुपये यापैकी जे कमी असेल ते.
ठिबक सिंचन संच पुरक अनुदान प्रति थेंब अधिक पीक योजनेंतर्गत (1) अल्प /अत्यल्प भूधारकांसाठी 55 टक्के + मुख्यमंत्री शाश्वत सिंचन योजनेतून 25 टक्के + बिरसा मुंडा कृषी क्रांती योजनेतून 10 टक्के तसेच (2) बहू भूधारकांसाठी 45 टक्के + मुख्यमंत्री शाश्वत सिंचन योजनेतून 30 टक्के + बिरसा मुंडा कृषी क्रांती योजनेतून 15 टक्के किंवा 97,000 रुपये यापैकी जे कमी असेल ते.यंत्रसामुग्री (बैलचलित/ ट्रॅक्टर चलित अवजारे) (नवीन बाब) साठी 50 हजार रुपये.परसबागेसाठी पाच हजार रुपये.
त्याचप्रमाणे या योजनेच्या यशस्वी अंमलबजावणीसाठी पुढीलप्रमाणे सुधारणा करण्यास मान्यता देण्यात आली आहे.या योजनेच्या लाभार्थ्यांसाठी लागू असलेली 1,50,000 रुपये वार्षिक उत्पन्न मर्यादेची अट रद्द करण्यात आली आहे.या योजनेंतर्गत यंत्रसामग्री (बैलचलित / ट्रॅक्टरचलित अवजारे) ही नवीन बाब समाविष्ट करण्यात आली आहे.नवीन विहीरीबाबत 4 लाख रुपये अनुदान मर्यादेपर्यंत विहीरीची खोली असावी, 12 मीटर खोलीची अट रद्द करण्यात आली आहे.महाराष्ट्र भूजल (पिण्याच्या पाण्यासाठी विनियमन) अधिनियम 1993 च्या कलम 3 नुसार अस्तित्वातील पेयजल स्त्रोताच्या 500 मीटर परिसरात नवीन विहिर घेण्यास प्रतिबंध घालण्यात आलेले आहेत. त्यामुळे अस्तित्वातील पेयजल स्त्रोताच्या 500 मीटर परिसरात सिंचन विहिर अनुज्ञेय करु नये, यास मान्यता देण्यात आली आहे. ही योजना अनुसूचित जमातीच्या लाभ धारकांसाठीच राबविण्यात येत असल्याने, दोन सिंचन विहिरींमधील 500 फूट अंतराची अट रद्द करण्यात आली आहे.
नवीन विहीर या घटकाचा लाभ घेतलेल्या लाभार्थीस 20 वर्षानंतर जुनी विहीर दुरुस्ती या घटकाचा लाभ देण्यात यावा. शेततळ्याचे प्लॅस्टिक अस्तरीकरण या घटकासाठी प्रचलित आर्थिक मापदंड व शेततळ्याचे आकारमानानुसार परिगणित होणाऱ्या रकमेच्या किंवा प्रत्यक्ष खर्चाच्या 90 टक्के किंवा 2 लाख रुपये यापैकी जे कमी असेल ते अनुदान देण्याची तरतूद करावी. शेततळ्याचे प्लॅस्टिक अस्तरीकरण या घटकाचा लाभ मागेल त्याला शेततळे या योजनेबरोबरच इतर योजनेंतर्गत शेततळ्याचा लाभ घेण्यात आलेल्या तसेच स्वखर्चाने शेततळे केलेल्या शेतकऱ्यांना देखील देण्याची तरतूद करण्यात आली आहे.
या योजनेंतर्गत लाभार्थ्यास नवीन विहीर, जुनी विहीर दुरुस्ती किंवा शेततळ्याचे प्लॅस्टिक अस्तरीकरण यापैकी एकाच घटकाचा व त्यासोबतच्या पॅकेजचा लाभ देय राहील.
अ) नवीन विहीर या घटकाचा लाभ घेणाऱ्या लाभार्थ्यास नवीन विहीर, इनवेल बोअरिंग, वीज जोडणी आकार, विद्युत पंपसंच/डिझेल इंजिन, सोलर पंप(वीज जोडणी व पंपसंच ऐवजी), एचडीपीई/ पीव्हीसी पाईप, सूक्ष्म सिंचन संच, यंत्रसामुग्री, परसबाग या घटकांसह एकूण 6,42,००० रुपये किंवा 6,92,००० रुपये एवढ्या मर्यादेत अनुदान देण्यात येईल. (विहीर- 4,00,000 रुपये + इनवेल बोअरिंग-40,000 रुपये + वीज जोडणी आकार- 20,000 रुपये + विद्युत पंपसंच/डिझेल इंजिन- 40,000 रुपये किंवा सोलर पंप(वीज जोडणी व पंपसंच ऐवजी)- 50,000 रुपये + एचडीपीई/पीव्हीसी पाईप- 50,000 रुपये + तुषार सिंचन संच 47,000 रुपये ठिबक सिंचन संच 97,000 रुपये + यंत्रसामुग्री- 50,000 रुपये+ परसबाग 5,000 रुपये = 6,42,000 रुपये किंवा 6,92,000 रुपये)
आ) जुनी विहीर दुरुस्ती या घटकाचा लाभ घेणाऱ्या लाभार्थ्यास जूनी विहीर दुरुस्ती, इनवेल बोअरिंग, वीज जोडणी आकार, विद्युत पंपसंच/डिझेल इंजिन, सोलर पंप(वीज जोडणी व पंपसंच ऐवजी), एचडीपीई/पीव्हीसी पाईप, सूक्ष्म सिंचन संच, यंत्रसामुग्री, परसबाग या घटकांसह एकूण 3,42,००० रुपये किंवा 3,92,००० रुपये एवढ्या मर्यादेत अनुदान देण्यात येईल. (जूनी विहीर दुरुस्ती- 1,००,००० रुपये+ इनवेल बोअरिंग- 40,000 रुपये + वीज जोडणी आकार-20,000 रुपये + विद्युत पंपसंच/डिझेल इंजिन- 40,000 रुपये किंवा सोलर पंप(वीज जोडणी व पंपसंच ऐवजी)- 50,000 रुपये + एचडीपीई/पीव्हीसी पाईप- 50,000 रुपये + तुषार सिंचन संच 47,000 रुपये ठिबक सिंचन संच 97,000 रुपये + यंत्रसामुग्री- 50,000 रुपये + परसबाग 5,000 रुपये = 3,42,000 रुपये किंवा 3,92,000 रुपये)
इ) शेततळ्याचे प्लॅस्टिक अस्तरीकरण या घटकाचा लाभ घेणाऱ्या लाभार्थ्यास शेततळ्याचे प्लॅस्टिक अस्तरीकरण, वीज जोडणी आकार, विद्युत पंपसंच/डिझेल इंजिन, सोलर पंप(वीज जोडणी व पंपसंच ऐवजी), एचडीपीई/पीव्हीसी पाईप, सूक्ष्म सिंचन संच, यंत्रसामुग्री, परसबाग या घटकांसह एकूण 4,०2,००० रुपये किंवा 4,52,००० रुपये एवढ्या मर्यादेत अनुदान देण्यात येईल. (शेततळ्याचे प्लॅस्टिक अस्तरीकरण – 2,००,००० रुपये + वीज जोडणी आकार- 20,000 रुपये + विद्युत पंपसंच/डिझेल इंजिन- 40,000 रुपये किंवा सोलर पंप(वीज जोडणी व पंपसंच ऐवजी)- 50,000 रुपये + एचडीपीई/पीव्हीसी पाईप- 50,000 रुपये + तुषार सिंचन संच 47,000 रुपये ठिबक सिंचन संच 97,000 रुपये + यंत्रसामुग्री- 50,000 रुपये + परसबाग 5,000 रुपये = 4,02,000 रुपये किंवा 4,52,000 रुपये).
