Last Updated on 10 Jan 2026 12:25 PM by Sanjay Patil/Adhorekhit
कला अकादमी येथे तीन दिवसीय साहित्यिक-सांस्कृतिक महोत्सव; देश-विदेशातील मराठी मान्यवरांची उपस्थिती
पणजी ।
‘शोध मराठी मनाचा’ या संकल्पनेवर आधारित २१व्या जागतिक मराठी संमेलनाचे उद्घाटन कला अकादमी, पणजी येथे उत्साहात पार पडले. ९ ते ११ जानेवारी २०२६ या कालावधीत गोव्यात होणारे हे तीन दिवसीय साहित्यिक व सांस्कृतिक संमेलन जागतिक मराठी अकादमी व गोवा राज्य आयोजन समितीच्या संयुक्त विद्यमाने आयोजित करण्यात आले आहे. या संमेलनात देश-विदेशातील मराठी अभ्यासक, लेखक, कलाकार व सांस्कृतिक विचारवंत सहभागी झाले आहेत.
उद्घाटन समारंभात पुरस्कार वितरण करण्यात आले तसेच संमेलनाची संकल्पना व व्याप्ती मांडणाऱ्या स्मरणिकेचे प्रकाशन करण्यात आले. मराठी साहित्य, रंगभूमी व चित्रपट क्षेत्रातील उल्लेखनीय योगदान देणाऱ्या मान्यवरांचा सत्कार करण्यात आला, ज्यामुळे मराठी भाषेच्या बौद्धिक, साहित्यिक व सांस्कृतिक प्रवासावर होणाऱ्या चर्चेला दिशा मिळाली.
कार्यक्रमाला संबोधित करताना मुख्यमंत्री डॉ. प्रमोद सावंत यांनी जागतिक मराठी संमेलनाचे आयोजन करण्याचा गोव्याला अभिमान असल्याचे सांगितले. मराठी भाषा आणि विचार आज प्रादेशिक मर्यादांपलीकडे जाऊन जागतिक स्तरावर पोहोचल्याचे त्यांनी नमूद केले. ‘शोध मराठी मनाचा’ ही संकल्पना मराठी भाषेच्या तत्त्वज्ञानात्मक व साहित्यिक प्रवासाचे तसेच जगभरातील मराठी भाषिक समाजाच्या सामूहिक योगदानाचे प्रतिबिंब असल्याचे त्यांनी सांगितले.
‘कलाक्षेत्रात गोव्याचे योगदान महत्त्वपूर्ण’: मुख्यमंत्री
मराठी संस्कृतीच्या मुळांवर भाष्य करताना मुख्यमंत्री यांनी संत नामदेव, संत एकनाथ आणि संत तुकाराम यांच्या अभंग परंपरेचा उल्लेख केला. मराठी साहित्य, काव्य, रंगभूमी व लोककला क्षेत्रातील गोव्याच्या योगदानावर त्यांनी प्रकाश टाकला. बाबा बोरकर, लक्ष्मणराव सरदेसाई आणि रवींद्र केळेकर यांच्या साहित्यिक कार्यांची त्यांनी आठवण करून दिली तसेच राष्ट्रीय शिक्षण धोरण २०२० नुसार मातृभाषेतून शिक्षणाचे महत्त्व अधोरेखित केले.
विख्यात मान्यवरांची सोहळ्याला उपस्थिती
उद्घाटन समारंभास संमेलनाध्यक्ष डॉ. अनिल काकोडकर, श्री अनिल सामंत, गोवा सरकारचे मंत्री श्री अनिल खांटे व श्री दशरथ परब, श्री चंद्रकांत कावलेकर, श्री उदयदादा लाड, श्री जयराज सालगांवकर, श्री यशवंतराव पाटील, श्री श्यामकांत देवरे, चित्रपट दिग्दर्शक श्री महेश मांजरेकर, लेखक-दिग्दर्शक श्री नागराज मंजुळे यांच्यासह देश-विदेशातील अभ्यासक, लेखक, कलाकार व प्रतिनिधी उपस्थित होते.
