हॉकीसाठी वाळवा तालुका शिक्षण संस्थेचे मोठे योगदान : जिल्हाधिकारी अशोक काकडे

ईश्वरपूर: राज्यस्तरीय शालेय हॉकी स्पर्धेच्या उद्घाटन प्रसंगी जिल्हाधिकारी अशोक काकडे. व्यासपीठावर उपसंचालक सुहास पाटील, जिल्हा क्रीडा अधिकारी किरण बोरवडेकर, प्रांताधिकारी श्रीनिवास अर्जुन, राष्ट्रीय हॉकी खेळाडू संजय पाटील, ॲड. धैर्यशील पाटील आदी.

बातमी शेअर करा :

Last Updated on 10 Dec 2025 10:11 PM by Sanjay Patil/Adhorekhit

सांगली । स्वातंत्र्यापूर्वी स्थापन झालेल्या वाळवा तालुका शिक्षण संस्थेने हॉकीच्या माध्यमातून गेल्या ३५- ४० वर्षांपासून क्रीडा स्पर्धांची जपलेली प्रतिमा परंपरा स्तुत्य आणि अभिमानास्पद आहे. खेळाडूमधली खिलाडू वृत्ती आणि युवकांसाठी कौशल्य विकास यापुढील काळात विद्यार्थ्यांच्या करिअरसाठी महत्त्वपूर्ण ठरणार आहे; असे प्रतिपादन जिल्हाधिकारी अशोक काकडे यांनी केले.

क्रीडा व युवक सेवा संचालनालय पुणे अंतर्गत जिल्हा क्रीडा अधिकारी सांगली, वाळवा तालुका शिक्षण संस्थेचे विद्यामंदिर हायस्कूल व कनिष्ठ महाविद्यालय आणि खा. एस.डी. पाटील चॅरिटेबल ट्रस्ट उरुण ईश्वरपूर यांच्या संयुक्त विद्यमाने १९ वर्षाखालील मुले व मुलींच्या राज्यस्तरीय शालेय हॉकी स्पर्धेच्या उद्घाटनप्रसंगी प्रमुख पाहुणे म्हणून जिल्हाधिकारी काकडे बोलत होते.

यावेळी प्रामुख्याने कोल्हापूर विभागाचे उपसंचालक सुहास पाटील जिल्हा क्रीडा अधिकारी किरण बोरवडेकर, उपविभागीय अधिकारी श्रीनिवास अर्जुन, तहसीलदार सारिका रासकर तसेच राष्ट्रीय हॉकी खेळाडू संजय पाटील, वाळवा तालुका शिक्षण संस्थेचे सहसचिव ॲड. धैर्यशील पाटील आदींची प्रामुख्याने उपस्थिती होती. प्रारंभी आपल्या स्वागत मनोगतामध्ये मुख्याध्यापक एस. एल. पाटील यांनी या संस्थेची आणि खासदार एस.डी. पाटील चॅरिटेबल ट्रस्ट यांच्या माध्यमातून झालेल्या विविध क्रीडा स्पर्धांची आणि राष्ट्रीय स्तरापर्यंत पोहोचलेल्या खेळाडूंची माहिती दिली.

जिल्हाधिकारी काकडे म्हणाले, महाराष्ट्राचा अंतिम संघ येथील शालेय हॉकी स्पर्धेमधून निवडला जाणार आहे. खेळाडूंमधील खिलाडू वृत्ती खूप महत्त्वाची असते. मुलींसाठी यापुढे मुलींचे सबलीकरण आणि कराटे प्रशिक्षण यासाठी देखील लक्ष दिले जात आहे.

जिल्हा क्रीडा अधिकारी किरण बोरवडेकर यांनी; वाळवा शिक्षण संस्थेने आणि एस. डी. पाटील चॅरिटेबल ट्रस्टने अनेक राष्ट्रीय हॉकी खेळाडू घडविण्यासाठी सातत्य आणि प्रयत्न उत्स्फूर्तपणे सुरू ठेवल्याबद्दल संस्थेची प्रशंसा केली. याप्रसंगी प्राचार्य डॉ.ए.एम.जाधव, प्राचार्य डॉ.ए.एल. बेलवटकर यांच्यासह मान्यवर उपस्थित होते.

१९ वर्षाखालील मुले व मुलींच्या राज्यभरातील पुणे, अमरावती, क्रीडा प्रबोधिनी पुणे, नाशिक, लातूर, छत्रपती संभाजीनगर, कोल्हापूर असे ९ विभागांचे संघ सहभागी झाले आहेत. या स्पर्धांसाठी संघनिवडीसाठीची निवड समिती, राज्यभरातील खेळाडू, त्यांचे संघ व्यवस्थापक, प्रशिक्षक देखील सहभागी आहेत. या स्पर्धेचे संयोजन विद्यामंदिर हायस्कूलचे शिक्षक सहकारी तसेच संजय चरापले, ताहीर खाटीक, संजय चव्हाण, संजय कबुरे, राजेंद्र खंकाळे सुहास पाटील, क्रीडा शिक्षक एस. बी. जाधव व सहकारी करत आहेत.खा. एस.डी.पाटील ट्रस्ट व विद्यामंदिर हायस्कूल ईश्वरपूर यांच्यावतीने राज्यभरातून आलेल्या खेळाडूंची निवास व भोजन व्यवस्था करण्यात आली आहे.