Last Updated on 04 Nov 2022 8:10 PM by Sanjay Patil/Adhorekhit
🌑 येणाऱ्या काळात शेतकऱ्यांना वीजेची कोणतीही अडचण भासणार नाही
🌑 वीजेचे सर्व फिडर सौरउर्जेवर आणणार;चार हजार मेगावॅट वीजेचे उद्दिष्ट
🌑 शेतकऱ्यांना दिवसा 12 तास वीज देण्याचा प्रयत्न
🌑 65 मिली पावसाच्या अटीमध्ये बदल
🌑 सातत्याने सात-आठ दिवस पाऊस पडून पिकांचे नुकसान झाल्यास मदत
सोलापूर । सोलर फिडरसाठी शेतकऱ्यांची जमीन हेक्टरी 75 हजार रूपये भाड्याने घेणार असून यातून शेतकऱ्यांना शाश्वत भाडे मिळेल.याबरोबरच 30 वर्षांनी जमीन परत दिली जाईल.यामुळे शेतकऱ्यांच्या जीवनात परिवर्तन घडणार आहे,असा विश्वास उपमुख्यमंत्री देवेंद्र फडणवीस यांनी व्यक्त केला.येत्या काळात शेतकऱ्यांना 12 तास वीज देण्याचा प्रयत्न करणार असल्याची ग्वाहीही त्यांनी दिली.
बार्शी येथे विविध विकास कामांच्या ऑनलाईन लोकार्पण आणि भूमिपूजनप्रसंगी ते बोलत होते. यावेळी महसूलमंत्री तथा जिल्ह्याचे पालकमंत्री राधाकृष्ण विखे-पाटील, खासदार रणजितसिंह नाईक-निंबाळकर, आमदार सर्वश्री सुभाष देशमुख, विजयकुमार देशमुख, राजेंद्र राऊत, सचिन कल्याणशेट्टी, राम सातपुते, राणा जगजितसिंह पाटील, सुरेश धस, माजी आमदार प्रशांत परिचारक आदींसह नगरपालिकेचे पदाधिकारी, मुख्याधिकारी श्री. चव्हाण यांच्यासह शेतकरी उपस्थित होते.
श्री. फडणवीस म्हणाले, हे सरकार शेतकऱ्यांच्या पाठीशी खंबीरपणे असून शेतकरी, कष्टकरी, सामान्य नागरिकांच्या जीवनात परिवर्तन घडविण्यासाठी शक्ती द्यावी, अशी मागणी भगवंताकडे केली आहे. सोलर फिडरसाठी शेतकऱ्यांची जमीन हेक्टरी 75 हजार रूपये भाड्याने घेणार असून यातून शेतकऱ्यांना शाश्वत भाडे मिळेल. याबरोबरच 30 वर्षांनी जमीन परत दिली जाईल. यामुळे शेतकऱ्यांच्या जीवनात परिवर्तन घडणार आहे. गेल्या तीन महिन्यात सात हजार कोटींची मदत अतिवृष्टीग्रस्त शेतकऱ्यांना केली आहे. एनडीआरएफ निकषाच्या दुप्पट पैसे आणि दोन हेक्टरऐवजी तीन हेक्टरपर्यंत मदत देण्याचा निर्णय सरकारने घेतला आहे. पूर्वी 65 मिली पावसाच्या अटीमध्ये बदल करून सातत्याने सात-आठ दिवस पाऊस पडून शेतकऱ्यांच्या पिकांचे नुकसान झाल्यास मदत देण्याच्या निर्णयामुळे अनेक शेतकऱ्यांना याचा लाभ होणार आहे.
शासन शेतकऱ्यांच्या पाठीशी असून त्यांच्या जीवनात परिवर्तन घडविण्यासाठी प्रयत्नशील आहे. येणाऱ्या काळात शेतकऱ्यांना वीजेची कोणतीही अडचण भासणार नाही, यासाठी वीजेचे सर्व फिडर सौरउर्जेवर आणणार आहे. यातून चार हजार मेगावॅट वीजेचे उद्दिष्ट ठेवले असून यातून येत्या काळात शेतकऱ्यांना 12 तास वीज देण्याचा प्रयत्न करणार असल्याची ग्वाही उपमुख्यमंत्री फडणवीस यांनी दिली.
भगवंत मंदिर येथे दर्शन
श्री. फडणवीस यांनी आज बार्शी येथील ग्रामदैवत श्री भगवंतांचे दर्शन घेतले. यावेळी पालकमंत्री राधाकृष्ण विखे-पाटील, खासदार रणजितसिंह नाईक-निंबाळकर, आमदार राजेंद्र राऊत, राणा जगजितसिंह पाटील, मंदिर समितीचे अध्यक्ष दादा बुहूक उपस्थित होते.
