Last Updated on 04 Jul 2023 8:30 PM by Sanjay Patil/Adhorekhit
शेतकऱ्यांनी पुरेसा पाऊस पडल्यानंतरच पेरणी करावी – कृषि आयुक्त सुनील चव्हाण
राज्यात 3 जुलैपर्यंत 58.8 टक्के इतका पाऊस
पुणे । खरीप हंगामातील सरासरी पेरणीचे क्षेत्र 142 लाख हेक्टर आहे.पुरेसा पाऊस झालेला नसल्याने प्रत्यक्षात 20.60 लाख हेक्टर म्हणजे 14 टक्के पेरणी झाली आहे.राज्यामध्ये आवश्यकतेनुसार बियाणे व खतांचा साठा उपलब्ध असून शेतकऱ्यांनी पुरेसा पाऊस पडल्यानंतरच पेरणी करावी,असे आवाहन राज्याचे कृषि आयुक्त सुनील चव्हाण यांनी केले आहे.

चालू खरीप हंगामाकरिता राज्यास 19.21 लाख क्विंटल बियाणे गरजेच्या तुलनेत सद्यस्थितीत प्राथमिक अंदाजानुसार 21.78 लाख क्विंटल बियाणे उपलब्ध आहे. राज्यासाठी 15 लाख 92 हजार 466 क्विंटल म्हणजे 82 टक्के बियाणे उपलब्ध झाली आहेत.खरीप हंगामासाठी 43.13 लाख मे.टन खतांच्या पुरवठ्याचे नियोजन मंजूर असून आत्तापर्यंत 44.12 लाख मे. टन खतांचा साठा उपलब्ध झाला आहे.त्यापैकी 16.53 लाख मे.टन खतांची विक्री झाली असून सद्यस्थितीत राज्यात 27.58 लाख मे. टन खतांचा साठा उपलब्ध आहे.
राज्यात ३ जुलै पर्यंत 140.9 मिमी. पाऊस झाला असून सरासरी पर्जन्यमानाच्या 239.6 मिमी. म्हणजे 58.8 टक्के इतका पाऊस पडला आहे. शेतकऱ्यांनी आवश्यकतेनुसार बियाणांची व खतांची खरेदी करावी असे श्री. चव्हाण यांनी कळविले आहे.
डॉ. पंजाबराव देशमुख जैविक शेती मिशन योजनेला 5 वर्षासाठी मुदतवाढ
राज्यात नैसर्गिक, सेंद्रिय शेतीला प्रोत्साहन देण्यासाठी डॉ. पंजाबराव देशमुख नैसर्गिक शेती मिशन या योजनेला सन 2027-28 पर्यंत मुदतवाढ देऊन या योजनेची व्याप्ती दुसऱ्या टप्प्यात राज्यभर वाढवण्यास मान्यता देण्यात आली आहे. या योजनेसाठी राज्य व केंद्र पुरस्कृत योजनेत 1920 कोटी 99 लाख इतक्या आर्थिक तरतुदीस मान्यता देण्यात आली आहे, अशी माहितीही कृषि आयुक्त सुनील चव्हाण यांनी दिली आहे.









































































