राज्यातील शेतकऱ्यांच्या जीवनात क्रांती घडविण्यासाठी आता कृषी क्षेत्रात 'एआय'चा वापर

राज्यातील शेतकऱ्यांच्या जीवनात क्रांती घडविण्यासाठी आता कृषी क्षेत्रात ‘एआय’चा वापर

बातमी शेअर करा :

Last Updated on 03 Feb 2025 3:00 PM by Sanjay Patil/Adhorekhit

कृषी क्षेत्रात ‘एआय’च्या वापराबाबत उपमुख्यमंत्री अजित पवार यांच्या अध्यक्षतेखाली आढावा बैठक

मुंबई । शेतमालाच्या उत्पादन वाढीसोबतच उत्पादन खर्चातील बचतीसाठी कृषी क्षेत्रात कृत्रिम बुद्धिमत्तेचा अर्थात ‘एआय’चा वापर अनिवार्य आहे. राज्यातील शेतकऱ्यांच्या जीवनात क्रांती घडविण्यासाठी कृषी क्षेत्रात प्रायोगिक तत्त्वावर एआयचा वापर विचाराधीन आहे. त्यासाठी कृषी विभागाने सहकार विभागासोबत समन्वय करून या प्रकल्पाची तांत्रिक आणि आर्थिक व्यवहार्यता तपासून पाहण्याचे निर्देश उपमुख्यमंत्री अजित पवार यांनी आज दिले.

राज्यातील कृषी क्षेत्रातील एआयच्या वापराबाबत उपमुख्यमंत्री अजित पवार यांच्या अध्यक्षतेखाली मंत्रालयातील बैठकीचे आयोजन करण्यात आले होते. यावेळी राज्याचे कृषी मंत्री माणिकराव कोकाटे यांच्यासह संबंधित विभागांचे अधिकारी उपस्थित होते.

बदलते हवामान, अवेळी पडणारा पाऊस, पीकांवर वारंवार होणारा रोगांचा प्रादुर्भाव, मजुरांचा तुटवडा यांवर मात करत शेतकऱ्यांचे उत्पादन वाढविण्याबरोबरच त्यांच्या उत्पादन खर्चात बचत करण्यासाठी कृषी क्षेत्रात एआयच्या वापराला पर्याय नसल्याचे अजित पवार यांनी यावेळी सांगितले.

एआयच्या वापराने पीक आरोग्याचे विश्लेषण, मातीतील कार्बन प्रमाण शोधणे, मातीच्या आरोग्याची सविस्तर माहिती, तणाचा प्रकार ओळखणे, पूर्वीच्या उत्पन्नाची तुलना, मातीचे तापमान, वातावरणातील आर्द्रता, पिकांवरील कीड व रोगांचा प्रादुर्भाव ओळखणे, तसेच पिकांवरील जैविक-अजैविक ताण ओळखणे शक्य होणार आहे. एआय तंत्रज्ञानाचा वापराने पीकांच्या उत्पादनात वाढ, मजुरी खर्चात बचत, रसायनिक खते व औषधांच्या वापरात कपात, कापणी कार्यक्षमतेत वाढ, रोगनियंत्रणाद्वारे बचत, पुरवठा साखळीतील कार्यक्षमतेत वाढ आणि एकूण खर्चात कपात होणे शक्य होईल. कृषी क्षेत्रात प्रायोगिक तत्त्वावर कृत्रिम बुद्धिमत्तेचा वापरासाठी कृषी विभागाने सहकार विभागासोबत समन्वय करून या प्रकल्पाची तांत्रिक व आर्थिक व्यवहार्यता तपासून पाहावी, असे निर्देश उपमुख्यमंत्री अजित पवार यांनी यावेळी दिले.