'नमो शेतकरी महासन्मान निधी'च्या पहिल्या हप्ताचे वितरण; राज्यातील 86 लाख शेतकऱ्यांना लाभ

‘नमो शेतकरी महासन्मान निधी’च्या पहिल्या हप्ताचे वितरण; राज्यातील 86 लाख शेतकऱ्यांना लाभ

बातमी शेअर करा :

Last Updated on 26 Oct 2023 11:34 PM by Sanjay Patil/Adhorekhit

पंतप्रधान नरेंद्र मोदींच्या हस्ते ‘नमो शेतकरी महासन्मान निधी’च्या पहिल्या हप्ताचे वितरण

सर्वाधिक लाभार्थी शेतकरी अहमदनगर जिल्ह्यात

शिर्डी | केंद्र सरकारच्या प्रधानमंत्री किसान सन्मान निधी योजनेच्या धर्तीवर महाराष्ट्र शासनाने शेतकऱ्यांसाठी सुरु केलेल्या ‘नमो शेतकरी महासन्मान निधी’ योजनेचा आज पंतप्रधान नरेंद्र मोदी यांच्या हस्ते शुभारंभ करण्यात आला.

कार्यक्रमाला राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार, पालकमंत्री राधाकृष्ण विखे-पाटील तसेच अन्य नेते उपस्थित होते.

प्रधानमंत्री श्री. मोदी यांनी एका क्लिकद्वारे राज्यातील 85 लाख 60 हजार शेतकऱ्यांच्या खात्यावर 1712.02 कोटी रुपये पाठवून योजनेचा शुभारंभ केला. दरम्यान, हा आपल्या जीवनातील ऐतिहासिक व अविस्मरणीय दिवस असल्याचे कृषिमंत्री धनंजय मुंडे यांनी दिलेल्या प्रतिक्रियेत नमूद केले आहे.

शेतकऱ्यांना निश्चित उत्पन्न प्राप्त व्हावे यासाठी केंद्र सरकारच्या प्रधानमंत्री किसान सन्मान योजनेमध्ये दरवर्षी शेतकऱ्यांच्या खात्यावर 6 हजार रुपये थेट जमा करण्यात येतात. त्याच धर्तीवर राज्य सरकारने सुरू केलेल्या ‘नमो शेतकरी सन्मान’ योजनेचा शुभारंभ आज प्रधानमंत्री नरेंद्र मोदी यांच्या हस्ते शिर्डी (जि. अहमदनगर) येथे करण्यात आला. राज्य सरकारच्या या योजनेमुळे केंद्र आणि राज्याचे मिळून शेतकऱ्यांना आता दरवर्षी 12 हजार रुपये मिळतील.

उपमुख्यमंत्री तथा तत्कालीन अर्थमंत्री देवेंद्र फडणवीस यांनी सन 2023 24 चा अर्थसंकल्पीय भाषणांमध्ये या योजनेचा शुभारंभ करण्याचे घोषणा केली होती. कृषिमंत्री धनंजय मुंडे यांनी पदभार स्वीकारल्यानंतर या योजनेला गती दिली. किरकोळ तांत्रिक कारणांमुळे राज्यातील 12 लाख शेतकरी प्रधानमंत्री किसान सन्मान योजनेपासून वंचित होते. या शेतकऱ्यांसाठी त्यांनी राज्यभरात विशेष मोहिम घेतली आणि 6 लाख शेतकरी प्रधानमंत्री किसान सन्मान योजनेत वाढविले.या शेतकऱ्यांना आता नमो किसान सन्मान योजनेचा सुद्धा लाभ मिळणार आहे.

नमो शेतकरी सन्मान योजनेचा लाभ मिळालेले सर्वाधिक शेतकरी अहमदनगर जिल्ह्यातील आहेत नगर जिल्ह्यातील 5 लाख 17 हजार 611 शेतकऱ्यांना 103 कोटी रुपये वितरित करण्यात आले त्या खालोखाल सोलापूर जिल्ह्यातील 4 लाख 54 हजार 40 शेतकऱ्यांना 90 कोटी 81 लाख, कोल्हापूर जिल्ह्यातील 4 लाख 6 हजार 240 शेतकऱ्यांना 81 कोटी रुपये वितरित करण्यात आले आहेत.

‘नमो शेतकरी सन्मान योजने’तून खात्यावर पैसे जमा झाल्याचे संदेश अनेक शेतकऱ्यांच्या मोबाईलवर प्राप्त झाले. त्यानंतर शेतकऱ्यांना आनंद झाला. खात्यावर 2 हजार रुपये प्राप्त झाल्याचा संदेश शेतकऱ्यांना समाधान देऊन गेला. शेतकऱ्यांनी हे संदेश इतरांना दाखवून आनंद व्यक्त केला. दुष्काळसदृश परिस्थिती असताना शेतकऱ्यांना यामुळे आधार मिळत आहे.

‘नमो शेतकरी महासन्मान निधी’ योजनेंतर्गत शेतकऱ्यांना केंद्राच्या योजनेव्यतिरिक्त 6 हजार रुपये दरवर्षी देण्यात येणार आहेत. या योजनेमुळे केंद्र आणि राज्याचे मिळून 12 हजार रुपये शेतकऱ्यांना मिळणार आहेत.या योजनेसाठी या वर्षी 6 हजार 900 कोटी रुपयांची तरतूद केली असून आज 85 लाख 60 हजार शेतकऱ्यांच्या खात्यावर 1712 कोटी रुपयांच्या पहिल्या हप्त्याचे वितरण करुन ‘नमो शेतकरी महासन्मान निधी’ योजनेचा शुभारंभ झाला.