कोल्हापूर । शिवाजी विद्यापीठाच्या वतीने शिवाजी विद्यापीठाच्या वर्धापन दिनानिमित्त शिवाजी विद्यापीठाच्या सल्गनित २९७ महाविद्यालयातील एका प्राध्यापकास दरवर्षी गुणवंत शिक्षक पुरस्कार प्रदान करण्यात येतो. प्राध्यापकाचे शिक्षण, त्याचे प्रसिद्ध झालेले शोधनिबंध, संशोधन ग्रंथ, आणि सामाजिक बांधिलकी या बाबींचा विचार करून गुणवंत शिक्षक पुरस्कार दिला जातो. या वर्षीचा गुणवंत शिक्षक पुरस्कार मलकापूर पेरीड येथील प्रा.डॉ.एन डी पाटील महाविद्यालयातील अर्थशास्त्र विभाग प्रमुख आणि माजी प्रभारी प्राचार्य प्रा.डॉ. जयवंत लीलावती शंकरराव इंगळे यांना विद्यापीठाच्या ६३ व्या वर्धापन दिनाच्या कार्यक्रमात विद्यापीठाच्या राजर्षी शाहू सभागृहात सन्मानपूर्वक प्रदान करण्यात आला. त्यांना हा पुरस्कार शिवाजी विद्यापीठाचे प्रभारी कुलगुरू आणि पुणे विद्यापीठाचे कुलगुरू प्रा. डॉ. सुरेश गोसावी यांच्या हस्ते प्रदान करण्यात आला.
जळगाव येथील कवयित्री बहिणाबाई चौधरी विद्यापीठाचे कुलगुरू प्राध्यापक डॉ. माहेश्वरी यांच्या अध्यक्षतेखाली संपन्न झालेल्या या कार्यक्रम प्रसंगी शिवाजी विद्यापीठाच्या प्रभारी कुलगुरू प्रा. डॉ वर्षा जाधव, कुलसचिव प्रा. डॉ. व्ही एन शिंदे, परीक्षा संचालक प्रा डॉ अजितसिंह जाधव, वित्त व लेखा अधिकारी सुहासिनी पाटील इत्यादी मान्यवर उपस्थित होते. 400 ग्र्याम वजनाचे चांदीचे शिवाजी विद्यापीठाचा लोगो असलेले स्मृतीचिन्ह, पाच हजार रुपये रोख, सन्मानपत्र, शाल आणि श्रीफळ असे पुरस्काराचे स्वरूप होते.
विविध रिसर्च जर्नल्स आणि कॉन्फरन्स प्रोसिडिंग मध्ये डॉक्टर इंगळे यांचे सुमारे 120 शोधनिबंध प्रसिद्ध झाले आहेत. विविध चर्चासत्र, कार्यशाळा यामध्ये सत्र अध्यक्ष, विषय तज्ञ, बीजभाषक या नात्याने त्यांनी सुमारे 50 व्याख्याने दिली आहेत. अर्थशास्त्र विषयाच्या 150 चर्चासत्रे, कार्यशाळा आणि परिषदांना ते उपस्थित राहिले आहेत. यामध्ये त्यांनी 55 शोधनिबंध सादर केले आहेत. त्यांनी विविध महाविद्यालयात 30 पेक्षा अधिक सेमिनार कार्यशाळांचे आयोजन केले आहे. अर्थशास्त्र विषयाच्या चार कॉन्फरन्स प्रोसिडिंगचे त्यांनी संपादन केले आहे. युट्युबवर अर्थशास्त्र आणि सामाजिक विषयावर त्यांचे 150 पेक्षा अधिक व्हिडिओ लेक्चर्स आहेत. महात्मा गांधी यांच्या विविध विचारावर युट्युबवर त्यांनी आतापर्यंत 75 व्याख्याने दिली आहेत. विविध महाविद्यालयात त्यांनी 70 व्याख्याने दिली आहेत. आकाशवाणीवर दहापेक्षा अधिक व्याख्याने दिली आहेत. प्रा डॉ इंगळे यांची दहा क्रमिक पुस्तके आणि पाच संशोधन ग्रंथ प्रसिद्ध आहेत. अर्थशास्त्र विषयाच्या 30 पुस्तकांचे त्यांनी संपादन केले आहे विविध 10 पुस्तकात 15 घटकांचे लेखन त्यांनी केले आहे. सकाळ, पुढारी, लोकसत्ता, महाराष्ट्र टाईम्स, महासत्ता, या वृत्तपत्रात त्यांचे सुमारे 30 आर्थिक व सामाजिक लेख प्रसिद्ध झाले आहेत. अर्थशास्त्र विषयातील त्यांचे चार संशोधन प्रकल्प पूर्ण झालेले आहेत. प्रा.डॉ इंगळे यांना अर्थशास्त्र विषयातील लेखनासाठी, संशोधन ग्रंथासाठी, शोधनिबंधासाठी नियोजन आयोगाचे उपाध्यक्ष प्रा. डॉ. मोन्टेक सिंग अहलुवालिया, सुषमा स्वराज, शरद पवार साहेब इत्यादी मान्यवरांच्या हस्ते सुमारे 30 पारितोषिके प्राप्त झाली आहेत. त्यांना ०४ आदर्श शिक्षक पुरस्कार व दोन उत्कृष्ट वाचक पुरस्कार मिळाले आहेत. त्यांना आतापर्यंत सुमारे 90 पारितोषिके प्राप्त झली आहेत.
प्रा.डॉ इंगळे हे पीएचडी चे मार्गदर्शक असून त्यांच्या मार्गदर्शनाखाली एका विद्यार्थ्याने एम.फील.पदवी आणि सहा विद्यार्थ्यांनी पीएचडी पदवी प्राप्त केली आहे. दोन विद्यार्थी त्यांच्याकडे पीएचडी करत आहेत. प्रा डॉ.जे एस इंगळे हे नॅशनल मेरिट स्कॉलर आहेत. त्यांना सलग पाच वर्ष भारत सरकारची राष्ट्रीय गुणवत्ता शिष्यवृत्ती मिळाली आहे. तसेच ते एम. ए. विद्यापीठ रँकर असून अर्थशास्त्र विषयात शिवाजी विद्यापीठात त्यांचा प्रथम क्रमांक असून रँकिंगमध्ये सर्व विद्यार्थ्यांमध्ये त्यांचा सहावा क्रमांक आहे. सद्या ते शिवाजी विद्यापीठ अर्थशास्त्र मंडळाचे चेअरमन असून विद्यापीठाच्या विद्या परिषद आणि मानव्यविद्या शाखेचे ते पदसिद्ध सदस्य आहेत. शिवाजी विद्यापीठाच्या ३० पेक्षा अधिक समितीवर त्यांनी अध्यक्ष, सदस्य म्हणून काम केले आहे.
प्राध्यापक डॉक्टर इंगळे हे अंक आदिवासी समाजाचे अभ्यासक आहेत. त्यांनी ठाणे रायगड पुणे जिल्ह्याच्या आदिवासी भागात अनेक वर्ष नोकरी केली असून आदिवासी जीवनावर त्यांनी पीएचडी, एम फील व दोन पदव्युत्तर पदव्या संपादन केल्या आहेत. तसेच काही वर्ष राष्ट्रीय सेवा योजनेचे कार्यक्रम अधिकारी म्हणून त्यांनी काम केले आहे. डॉ. इंगळे यांचे अर्थशास्त्र विषयातील योगदान आणि संशोधन कार्य विचारात घेऊन शिवाजी विद्यापीठाने त्यांना या वर्षाचा गुणवंत शिक्षक पुरस्कार देऊन गौरविले. त्याबद्दल त्यांचे सर्वत्र अभिनंदन होत आहे.
