Last Updated on 02 Apr 2025 5:47 PM by Sanjay Patil/Adhorekhit
सांगली । राज्याचे माजी मंत्री आ.जयंत पाटील यांच्या मार्गदर्शनाखाली कार्यरत असलेल्या राजारामबापू पाटील ललित कला अकादमी (महाराष्ट्र राज्य) या संस्थेच्या वतीने स्वर्गीय बापूंच्या स्मृतिप्रित्यर्थ राष्ट्रीय पातळीवर देण्यात येणारे ‘लोकनेते राजारामबापू पाटील राष्ट्रीय ललित कला सन्मान’ पुरस्कार अकादमीचे निमंत्रक कवी प्रा.प्रदीप पाटील व ज्येष्ठ सदस्य, कासेगाव शिक्षण संस्थेचे सचिव प्राचार्य आर.डी.सावंत यांनी पत्रकाद्वारे घोषित केले.
साहित्य क्षेत्रात राष्ट्रीय पातळीवर दिलेल्या महत्त्वपूर्ण योगदानाकरिता मराठी भाषा व सांस्कृतिक इतिहासाचे प्रसिद्ध अभ्यासक डाॅ.रमेश वरखेडे (नाशिक) यांना ‘लोकनेते राजारामबापू पाटील राष्ट्रीय ललित कला जीवन गौरव सन्मान’ पुरस्कार देण्यात येणार आहे. रू.५०,०००, सन्मानचिन्ह व मानपत्र असे सन्मानाचे स्वरुप आहे.
‘लोकनेते राजारामबापू पाटील राष्ट्रीय ललित कला सन्मान’ पुरस्कार
नाट्यक्षेत्रातील योगदानाकरिता प्रसिद्ध नाटककार अभिराम भडकमकर (मुंबई), कवितेतील योगदानाकरिता प्रसिद्ध कवयित्री व चित्रकार डॉ.मीनाक्षी पाटील(मुंबई), आदिवासी साहित्य संशोधनातील योगदाना करिता आदिवासी साहित्याचे अभ्यासक डाॅ.तुकाराम रोंगटे (पुणे) यांची निवड करण्यात आली आहे. प्रत्येकी रु.२५,०००, सन्मानचिन्ह व मानपत्र असे या सन्मानाचे स्वरुप आहे.
‘लोकनेते राजारामबापू पाटील राष्ट्रीय ललित कला विशेष सन्मान’ पुरस्कार लेखन व मराठी भाषेच्या प्रसाराकरिता लेखक अनिल सामंत (गोवा) आणि लेखन व मराठी साहित्य प्रसाराकरिता लेखक प्रकाश जडे (मंगळवेढा) यांना देण्यात येणार आहे. प्रत्येकी रु.१०,०००, सन्मानचिन्ह व मानपत्र असे त्याचे स्वरुप आहे. प्रसिद्ध विचारवंत व संत साहित्याचे अभ्यासक डाॅ.सदानंद मोरे यांच्या निवड समितीने या सन्मान पुरस्कारांची निवड केली आहे.
राजारामबापू पाटील ललित कला अकादमी आणि गोवा विद्यापीठ शणै गोंयबाब महाशाळा मराठी अध्ययन शाखा यांच्या संयुक्त विद्यमाने गोवा विद्यापीठामध्ये ११ एप्रिल रोजी सकाळी १०.०० वाजता होणा-या समारंभामध्ये प्रमुख पाहुणे गोवा राज्याचे मुख्यमंत्री डाॅ.प्रमोद सावंत यांच्या शुभ हस्ते, महाराष्ट्राचे माजी मंत्री, आ. जयंत पाटील यांच्या अध्यक्षतेखाली व सन्माननीय अतिथी कुलगुरु डाॅ. हरिलाल मेनन, संत साहित्याचे अभ्यासक डाॅ. सदानंद मोरे, कला शाखेच्या अधिष्ठाता प्रो.डाॅ.अनुराधा वागळे, मराठी अध्ययन शाखेचे प्रमुख डाॅ.विनायक बापट, राजारामबापू पाटील सह. साखर कारखान्याचे चेअरमन प्रतीक पाटील यांच्या प्रमुख उपस्थितीत हे सन्मान पुरस्कार प्रदान करण्यात येणार आहे. सन्मान पुरस्कारांचे हे तिसरे वर्ष आहे.
आपल्या रचनात्मक कार्याने शिक्षण, सहकार, कृषी, उद्योग अशा विविध क्षेत्रांचा विकास करून महाराष्ट्राच्या जडणघडणीमध्ये मोलाचे योगदान दिलेल्या स्वर्गीय लोकनेते राजारामबापू पाटील यांच्या विचारांची जोपासना व प्रसार राष्ट्रीय पातळीवर करण्याची भूमिका राजारामबापू पाटील ललित कला अकादमीची आहे. स्वर्गीय बापूंच्या ध्यासपूर्ण जीवनातून प्रतिभावंतांना निर्मितीच्या वेगळ्या वाटा उलगडत जाव्यात; या उदात्त हेतूने राजारामबापू पाटील ललित कला अकादमीने ललित कलांमधील व लोककलेतील प्रतिभावंतांचे योगदान विचारात घेऊन प्रतिवर्षी सन्मान पुरस्कार दिले जातात.
जिल्हा परिषदेचे माजी अध्यक्ष देवराज पाटील, स्वीय सहाय्यक मोहन चव्हाण, डाॅ. नम्रता बागडे (हैदराबाद), मोहन रेडगावकर (इंदूर), प्रा.अशोक आलगोंडी (बेळगाव), प्रा.मिलींद जोशी, सुनिताराजे पवार, शिरीष चिटणीस, विनोद कुलकर्णी, डाॅ.संदीप सांगळे, उद्योजक सतीश पाटील, सुनिल चव्हाण, विश्वनाथ पाटसुते, पुरुषोत्तम जोशी, प्रा. कामिनी वाघ, डाॅ.दत्ता बारबोले यांच्यासह महाराष्ट्र व महाराष्ट्राबाहेरील मान्यवरांचा अकादमीमध्ये समावेश आहे.
गोवा विद्यापीठ मराठी अध्ययन शाखेचे डाॅ.हेमंत अय्या,राजारामबापू पाटील ललित कला अकादमीचे सदस्य वसंत पाटील, डाॅ.अनिल मडके,अंजली कुलकर्णी, मनीषा पाटील, रुपाली अवचरे, सुभाष कवडे आदी सदस्य समारंभाच्या संयोजन समितीमध्ये कार्यरत आहेत.
