Last Updated on 08 Jul 2024 11:06 PM by Sanjay Patil/Adhorekhit
सातारा व पुणे जिल्ह्याला रेड अलर्ट
मुंबईलाही अतिमुसळधार पावसाचा इशारा
नागरिकांनी खबरदारी घेण्याचे प्रशासनाचे आवाहन
रायगड जिल्ह्यातील शाळा, महाविद्यालयांना मंगळवारी सुट्टी
मुंबई | भारतीय हवामान विभागाकडून दि. 08 जुलै 2024 रोजी प्राप्त झालेल्या सूचनेनुसार सातारा व पुणे या जिल्ह्यांना दि. 09 जुलै रोजी रेड अलर्टचा इशारा देण्यात आला असून त्या जिल्ह्यांमध्ये मुसळधार ते अतिमुसळधार पाऊस पडण्याची शक्यता आहे. राज्यातील मुंबई, रायगड, रत्नागिरी, सिंधूदुर्ग, पुणे, सातारा या जिल्ह्यांना आज रेड अलर्टचा इशारा देण्यात आला आहे.
सातारा व पुणे जिल्हा प्रशासनाला याबाबत सतर्क राहण्याच्या सूचना दिल्या असून त्या जिल्ह्यातील नागरिकांना मोबाईलवर सचेत ॲपद्वारे सतर्क राहण्याचा संदेश दिला आहे. नदीकाठी/ दरडप्रवण क्षेत्रातील नागरिकांनी आवश्यकता असल्यासच बाहेर पडावे. नदीनाल्याच्या पूलावरून पाणी वाहत असल्यास पूल ओलांडू नये. पर्यटनस्थळी धबधबे, धरण परिसर, घाटमाथा इ. ठिकाणी जाण्याचे टाळावे. वीज चमकत असताना झाडाखाली आश्रय घेऊ नये. तसेच अतिवृष्टी दरम्यान जुन्या मोडकळीस आलेल्या घरात/इमारतीत आश्रय घेऊ नये. आपत्कालीन परिस्थितीत घाबरून न जाता नागरिकांनी प्रशासनाच्या सूचनांचे पालन करुन प्रशासनास सहकार्य करावे. तसेच मदतीसाठी जिल्हा आपत्ती नियंत्रण कक्षाचा संपर्क क्र. 1077 हा असून यावर संपर्क साधावा. असे आवाहन राज्याच्या आपत्ती व्यवस्थापन कक्षाने केले आहे.
- दरड प्रवण क्षेत्रात राहणाऱ्या नागरिकांनी सतर्कता बाळगावी व स्वत:हुन सुरक्षित ठिकाणी स्थलांतरित व्हावे.
- मुसळधार पावसात आवश्यकता नसल्यास घराबाहेर पडू नये.
- नदीकाठच्या नागरिकांनी सतर्क रहावे.
- जुन्या मोडकळीस आलेल्या घरात/इमारतीत आश्रय घेऊ नका.
- नदी नाल्याच्या पुलावरून पाणी वाहत असल्यास पूल ओलांडू नका.
- पर्यटन स्थळे उदा. धबधबे, धरण परिसर, घाटमाथा इत्यादी ठिकाणी सुरक्षिततेच्या कारणास्तव जाणेचे टाळावे.
- पाऊस पडताना विजा चमकत असल्यास झाडाखाली आश्रय घेऊ नका, व मोबाईलचा वापर करू नका .
- प्रवास करतेवेळी घाट रस्याासत विनाकारण थांबु नये.
अफवांवर विश्वास ठेवू नका व अफवा पसरवू नका, असे आवाहनही जिल्हा प्रशासनाने केले आहे.
मुंबईलाही अतिमुसळधार पावसाचा इशारा देण्यात आला आहे.पावसामुळे ९ जुलै २०२४ रोजी सर्व शाळा आणि महाविद्यालये बंद राहणार आहेत.
पुणे जिल्ह्यात काही भागातील शाळांना मंगळवारी सुट्टी जाहीर
पुणे | प्रादेशिक हवामान केंद्राने जिल्ह्यात ९ जुलै रोजी अति मुसळधार पावसाचा इशारा दिला असल्याने जिल्ह्यात पुणे शहर, हवेली, आंबेगाव, खेड, जुन्नर, मावळ, मुळशी आणि भोर तालुक्यातील १२ वी पर्यंतच्या सर्व शाळांना ९ जुलै रोजी सुट्टी जाहीर करण्याचे आदेश जिल्हाधिकारी डॉ. सुहास दिवसे यांनी निर्गमीत केले आहेत.
अतिवृष्टीमुळे कोणत्याही प्रकारची अनूचित घटना घडू नये तसेच आपत्कालीन परिस्थिती निर्माण होऊन त्याचा परिणाम शालेय विद्यार्थ्यांवर होवू नये याकरीता वर नमूद तालुक्यातील १२ वी पर्यंतच्या सर्व शाळांना मंगळवारी सुट्टी राहील. तथापि, या कालावधीत सर्व मुख्याध्यापक, शिक्षक व शिक्षकेत्तर कर्मचारी यांनी कार्यालयीन वेळेत शाळेत उपस्थित राहून स्थानिक प्रशासनाच्या आदेशानुसार आपत्ती व्यवस्थापनाचे कामकाज करावे असेही आदेशात नमूद करण्यात आले आहे.
नागरिकांनी सावधानता बाळगावी, धबधब्याच्या ठिकाणी पर्यटनासाठी जाऊ नये. आवश्यक असेल तरच बाहेर पडावे, असे आवाहनही जिल्हाधिकाऱ्यांनी केले आहे.
महत्त्वाची सूचना : रायगड जिल्ह्यातील सर्व शाळा व महाविद्यालये आणि पुणे तसेच ठाणे जिल्ह्यातील १ ली ते १२ वी पर्यंतच्या शाळांना उद्या, मंगळवार दि. ९ जुलै रोजी सुट्टी आहे.
