पुणे विभागात २ लाख ७२ हजार पदवीधर आणि ४४ हजार शिक्षकांची नोंदणी; प्रारुप मतदार याद्या प्रसिद्ध

बातमी शेअर करा :

Last Updated on 04 Dec 2025 4:12 PM by Sanjay Patil/Adhorekhit

पदवीधर आणि शिक्षक मतदारसंघांचा मतदार यादी नव्याने तयार करण्याचा कार्यक्रम

पुणे । पुणे विभागातील पदवीधर व शिक्षक मतदार संघाच्या नव्याने मतदार यादी तयार करण्याच्या कार्यक्रमांतर्गत प्रसिद्ध करण्यात आलेल्या प्रारुप मतदार यादीनुसार पुणे विभागात २ लाख ७२ हजार ६१ पदवीधरांची तर ४४ हजार २३३ मतदारांची नोंदणी झाली आहे. ही माहिती विभागीय आयुक्त व मतदार नोंदणी अधिकारी डॉ. चंद्रकांत पुलकुंडवार यांनी दिली.

जिल्हानिहाय पदवीधर मतदारसंख्या

पुणे : ५४ हजार ८१०
सातारा : ३५ हजार ८७९
सोलापूर : ३० हजार ४७२
कोल्हापूर : ८० हजार १८०
सांगली : ७० हजार ७२०
एकूण : २ लाख ७२ हजार ६१ पदवीधर मतदार

✔ जिल्हानिहाय शिक्षक मतदारसंख्या

पुणे : ९ हजार ७७८
सातारा : ८ हजार ४९२
सोलापूर : ११ हजार १९८
कोल्हापूर : ८ हजार ६३१
सांगली : ६ हजार १३४
एकूण : ४४ हजार २३३ शिक्षक मतदार

२०२० मध्ये पदवीधर मतदार संघासाठी ४ लाख २० हजार ८९६ इतकी तर शिक्षक मतदारांची ७२ हजार १९० इतकी नोंदणी होती. गेल्या निवडणुकीपेक्षा यावर्षी आतापर्यंत कमी मतदार नोंदणी झाली आहे. त्यामुळे राजकीय पक्षांनी मतदार नोंदणीची प्रसिद्धी व जागृती करुन जास्तीत जास्त पात्र मतदारांना नोंदणीसाठी प्रोत्साहित करावे, असे आवाहन विभागीय आयुक्त तथा पुणे विभाग पदवीधर व शिक्षक मतदार संघाचे मतदार नोंदणी अधिकारी डॉ. चंद्रकांत पुलकुंडवार यांनी केले आहे.

मतदार याद्या नव्याने तयार करण्याचा कार्यक्रम:

या कार्यक्रमांतर्गत १८ डिसेंबर २०२५ पर्यंत मतदान केंद्रावर उपस्थित असलेल्या पदनिर्देशित अधिकारी किंवा संबंधित विधानसभा मतदार संघाचे सहायक मतदार नोंदणी अधिकारी यांच्याकडे दावे व हरकती दाखल करता येतील. नवीन नाव नोंदणीचा दावा दाखल करण्यासाठी पदवीधरांना नमुना क्रमांक १८ व शिक्षकांना नमुना क्रमांक १९ द्वारे याच कालावधीत दावा दाखल करता येईल. प्रारुप मतदार यादीतील नावांबाबत आक्षेप असल्यास नमुना क्रमांक ७ व यादीतील नोंदीमध्ये दुरुस्तीसाठी नमुना क्रमांक ८ दाखल करता येईल.

दावे व हरकतींचा कालावधी संपल्यानंतर ५ जानेवारी २०२६ रोजी दावे व हरकती निकाली काढून पुरवणी यादी तयार करणे व छपाईची कार्यवाही करण्यात येईल. पदवीधर व शिक्षक मतदार संघाच्या यादीची अंतिम प्रसिद्धी १२ जानेवारी २०२६ रोजी केली जाणार आहे.